నిమ్మగడ్డ నియామకంపై “హైకోర్టు తీర్పు – గవర్నర్ స్పందన” అంశంపై ఎవరికి నచ్చినట్లుగా వారు భావానువాదం చేసుకుంటున్న సంగతి తెలిసిందే. అసలు తీర్పు పాఠంలో ఉన్నదేమిటి… అసలు గవర్నర్ ఫైనల్ గా చెపిందేమిటి అన్న విషయాల్లో… ఎవరి క్రియేటివిటీకి వారు పనిచెప్పుకుని… “పరిశీలించండి” అనడానికి “నియమించండి” అనడానికీ ఉన్న తేడాను కూడా పక్కనపెట్టి ముందుకు పోతున్నారు! ఈ క్రమంలో వైకాపా రెబల్ ఎంపీ రఘురామకృష్ణంరాజు సైతం తనదైన స్పందనను తెలియచేస్తూ… తన ఊహలకు హద్దులేదని నిరూపించేప్రయత్నం చేశారు!
అలా జరగాలనేది ఆయన మనసులోని కోరికో లేక… అంతా స్పందిస్తున్నారు కదా తాను మరింత భిన్నంగా స్పందించాలనే తపనో తెలియదు కానీ… నిమ్మగడ్డ రమేష్ కుమార్ ని రాష్ట్ర ఎన్నికల కమిషనర్ గా నియమించకపోతే… రాష్ట్రపతి పాలన వచ్చే అవకాశాలున్నాయని చెప్పుకొచ్చారు ఆర్.ఆర్.ఆర్.! ఈ విషయంలో తనదైన గోదావరి వెటకారంలో స్పందించే క్రమంలో… “నిమ్మగడ్డ నియామకంలో గవర్నర్ సూచన ప్రభుత్వానికి ఎదురు దెబ్బా, కదా అన్న సంగతి కాసేపు పక్కనపెడితే…” అంటూ మొదలుపెట్టారు.. ఆర్.ఆర్.ఆర్.!
అనంతరం “ఇది మంచి పరిణామం.. గవర్నర్ గారు ఆలస్యం అయినా సరైన నిర్ణయం తీసుకున్నారు.. మా రాష్ట్ర ప్రభుత్వం ఈ విషయాన్ని ఇంకా సాగతియ్యకుండా, గవర్నర్ నిర్ణయన్ని అమలు చెయ్యటమే ఉత్తమం! ఎందుకంటే ఇప్పటికే చాలా ఎదురు దెబ్బలు తగిలాయి. రేపు సుప్రీం కోర్టుకు వెళ్ళినా ఇదే తీర్పు వస్తుంది. అలా కాదని ముందుకు వెళ్తే.. రాజ్యాంగా సంక్షోభం వస్తుంది. అప్పుడు ఆర్టికల్ 356 ఇన్వొక్ చేస్తే బలవంతంగా ప్రెసిడెంట్ రూల్ పెట్టే అవకాశం ఉంటుంది” అంటూ తన కోరికను అభిప్రాయంగా చెప్పినంత పనిచేశారు!!
