YSRCP: వైసీపీ అధినేత, సీఎం వైఎస్ జగన్ ఈరోజు ఎన్నికల ప్రచారానికి శ్రీకారం చుట్టారు. మేమంతా సిద్ధం పేరిట చేపడుతున్న ఈ ఎన్నికల ప్రచారంలో భాగంగా తొలి రోజు సభను కడప జిల్లా ప్రొద్దుటూరులో నిర్వహించారు. ఈ సభలో జగన్ ప్రసంగించారు. విపక్షాలను టార్గెట్ చేస్తూ తీవ్ర స్థాయిలో విమర్శలు చేశారు. ఇంత పెద్ద మీటింగ్ ఈ జిల్లాలో ఎప్పుడూ జరిగి ఉండదేమో అనేలా జన సంద్రం కనిపిస్తోందని హర్షం వ్యక్తం చేశారు. ఇప్పటి వరకు తన విజయాలకు కారణమైన జిల్లా ప్రజలందరికీ కృతజ్ఞతలు తెలియజేస్తున్నానన్నారు.
ఈ రోజు రాష్ట్రంలో కోట్లాది గుండెలు మన పార్టీకి, మన ప్రభుత్వానికి మద్దతు పలుకుతూ 2024 ఎన్నికల సమరానికి సిద్ధం అంటున్నాయని అన్నారు. మన జెండా మరే జెండాతో జట్టు కట్టడంలేదని అన్నారు. ప్రజలే అజెండాగా మన జెండా ఇవాళ రెపరెపలాడుతోందన్నారు. పేదల అభివృద్ధికి అడుగడుగునా అడ్డుపడుతున్న ఈ దుష్టచతుష్టయాన్ని ఓడించాలని పిలుపునిచ్చారు. ప్రజలే శ్రీకృష్ణుడిగా నేను అర్జునుడిగా ఎన్నికల సమరశంఖం పూరిస్తున్నానన్నారు. మరో 45 రోజుల్లో జరగనున్న ఎన్నికల్లో ప్రతి ఒక్కరూ రెండు సార్లు ఫ్యాన్ గుర్తుపై ఓటేయాలని అభ్యర్ధించారు.
అబద్ధాలు చెప్పేవాళ్లు, మోసాలు చేసే వాళ్లు మనకు ప్రత్యర్థులుగా ఉన్నారని జగన్ అన్నారు. ప్రజలకు మంచి చేసే అలవాటు లేని చెడ్డవాళ్లంతా కూటమిగా వస్తున్నారని, మీ బిడ్డ ఒంటరిగా ఎన్నికల యుద్ధంలో అడుగుపెడుతున్నాడని చెప్పారు. ప్రజలను నమ్మించి మోసం చేయడంలో, కుట్రలు, కుతంత్రాలు చేయడంలో, వెన్నుపోటు పొడవడంలో చంద్రబాబుకు 45 ఏళ్ల అనుభవం ఉందని విమర్శించారు. ఎన్నికలయ్యాక మేనిఫెస్టోను చెత్తబుట్టలో వేయడంలో కూడా చంద్రబాబుకు 14 ఏళ్ల అనుభవం ఉందని అన్నారు. అబద్ధాలతో గోబెల్స్ ప్రచారం చేయడంలోనే కాదు… వీళ్లకు కుటుంబాలను చీల్చడంలో కూడా బాగా అనుభవం ఉందని దుయ్యబట్టారు. ఇటీవల జరుగుతున్న పరిణామాలను అందరూ చూస్తున్నారన్నారు. మా బాబాయిని ఎవరు చంపారో..? ఎవరు చంపించారో ..? ఆ దేవుడికి, ఈ జిల్లా ప్రజలందరికీ తెలుసునన్నారు. కానీ బురద చల్లేందుకు ఇద్దరు చెల్లెమ్మలను ఎవరు పంపించారో, వారి వెనుక ఎవరు ఉన్నారో మీ అందరికీ రోజూ కనిపిస్తూనే ఉందని అన్నారు.
చిన్నాన్న వివేకాను అతి దారుణంగా చంపి, అవును నేనే చంపాను అని బహిరంగంగా చెప్పుకుంటూ తిరుగుతున్న హంతకుడికి ఎవరు మద్దతు ఇస్తున్నారో మీరందరూ రోజూ చూస్తున్నారని అన్నారు. ఆ చంపినోడ్ని నెత్తినపెట్టుకుని మద్దతు ఇస్తున్నది చంద్రబాబు, ఈ చంద్రబాబుకు సంబంధించిన ఎల్లోమీడియా, చంద్రబాబుకు చెందిన మనుషులు, వీరి మద్దతు కోసం రాజకీయ స్వార్థంతో తపించిపోతున్న ఒకరిద్దరు నా వాళ్లు (చెల్లెళ్లు) ఉన్నారన్నారు. వీరంతా ఆ హంతకుడికి నిస్సిగ్గుగా మద్దతు ఇస్తున్నారంటే, చిన్నాన్నను ఎమ్మెల్సీ ఎన్నికల్లో ఓడించిన వారితో చెట్టాపట్టాలేసుకుని తిరుగుతున్నారంటే అర్థమేమిటి అని ప్రశ్నించారు. ప్రజల మద్దతులేని చంద్రబాబు చేస్తున్న ఈ నీచ రాజకీయంలో ఎవరు ఎటువైపు ఉన్నా నేను మాత్రం ప్రజల పక్షానే ఉన్నానని గర్వంగా చెబుతున్నానన్నారు.
ఇదే సందర్భంలో ఇటీవల విశాఖలో కలకలం రేపిన డ్రగ్స్ కంటైనర్ వ్యవహారంపైనా జగన్ స్పందించారు. చంద్రబాబు వదిన చుట్టం తాలూకు కంపెనీకి బ్రెజిల్ నుంచి డ్రైడ్ ఈస్ట్ పేరుతో డ్రగ్స్ ను పెద్ద మొత్తంలో దిగుమతి చేస్తుంటే సీబీఐ వాళ్లు దాడి చేసి పట్టుకుంటే ఎల్లో బ్రదర్స్ అందరూ ఉలిక్కిపడ్డారన్నారు. దొరికింది వాళ్ల బ్రదరే అయినా, అతడు దొరికిపోయాడు కాబట్టి అతడిని మన (వైసీపీ) వాడు అని దుష్ప్రచారం చేస్తున్నారన్నాని దుయ్యబట్టారు. నేరం ఎక్కడైనా జరగనివ్వండి, ఎక్కడ ఏం జరిగినా మన మీద బురద చల్లడానికి ఒక చంద్రబాబు, ఒక దత్తపుత్రుడు వెంటనే రెడీ అయిపోతారని అన్నారు.
వీళ్లు (చంద్రబాబు, దత్తపుత్రుడు) కేంద్రం నుంచి ఒక పార్టీని ప్రత్యక్షంగా మద్దతు తెచ్చుకున్నారు, పరోక్షంగా మరో పార్టీని మద్దతు తెచ్చుకున్నారని విమర్శించారు జగన్. వీళ్లందరూ ఏకమై ఒక్క జగన్ మీద యుద్ధం చేస్తున్నారన్నారు. ఎల్లో మీడియా, ఒక బీజేపీ, ఒక కాంగ్రెస్… వీళ్లంతా సరిపోవడంలేదని నా చెల్లెళ్లు ఇద్దరినీ కూడా తెచ్చుకున్నారని జగన్ ఎద్దేవా చేశారు. ఒకే ఒక్కడి మీద ఒంటరిగా వచ్చే ధైర్యం ఎవరికీ లేదంటే అందుకు కారణం.. ఆ దేవుడి దయ, ఇన్ని కోట్ల గుండెలు తోడుగా మీ జగన్ కు ఉండటమేనని అన్నారు.
BJP: ఏపీ అసెంబ్లీ అభ్యర్ధులను ప్రకటించిన బీజేపీ