టీడీపీ కంకణబద్దుడు, చంద్రబాబుకు అత్యంత సన్నిహితుడు.. మరో విధంగా చెప్పాలంటే టీడీపీలో నెంబర్ టూ.. సుజనా చౌదరి ఏడాది క్రితం బీజేపీలో చేరారు. ఈ ఏడాది కాలంలో ఒక్కసారి కూడా బీజేపీకి అనుగుణంగా, ఆరెస్సెస్ వాదిగా ఎప్పుడూ మాట్లాడలేదు. చంద్రబాబు ఏమి మాట్లడతారో.. బీజేపీలో ఉంటూ సుజనా కూడా అదే మాట్లాడేవారు. ఇందుకు ఉదాహరణ అమరావతి అంశం. అమరావతి ఎక్కడికీ పోదు అంటూ చంద్రబాబు వాదననే వినిపించారు. కానీ.. ఇప్పుడు రాజధాని అమరావతి నుంచి తరలిపోయే అవకాశం కనిపిస్తోంది. కేంద్రం కూడా మద్దతిచ్చే పరిస్థితులు కనిపిస్తున్నాయి. మరి ఇప్పుడు సుజనా పరిస్థితి ఏంటి..?
సైలెంట్ గా లేకపోతే వేటు ఖాయమే..!
ఏపీకి బీజేపీ కొత్త అధ్యక్షుడు సోము వీర్రాజు దూకుడు మీద ఉన్నారు. ఎవరు గీత దాటినా, టీడీపీకి అనుకూలంగా ఉన్నా వేటు పడుతోంది. ఇప్పటికే వెలగపూడి రామకృష్ణ, ఓవీ రమణలపై వేటు వేశారు. ఇప్పుడు లంకా దినకర్ పేరు కూడా ఈ లిస్టులో ఉంది. వీరితోపాటు మరో ఇద్దరు కీలక నాయకుల పేర్లు కూడా వినిపిస్తున్నాయి. వీరి తర్వాత సుజనా పేరు కూడా వినిపిస్తోంది. దీంతో సుజనా ఎట్టి పరిస్థితుల్లోనూ సైలెంట్ గా ఉండాల్సిన పరిస్థితి. ప్రస్తుతం బీజేపీకి ఏపీలో బలపడటం ముఖ్యం. జనసేనతో కలిసి రెండో స్థానం దక్కించుకోవాలని దారులు పరుచుకుంటోంది. ఈ నేపథ్యంలో అడ్డుగా వస్తున్న టీడీపీని పక్కన పెట్టడానికి బీజేపీ ఎలాంటి నిర్ణయం తీసుకోవడానికైనా సిద్ధంగా ఉంది. ఈ సమయంలో టీడీపీకి అనుకూలంగా మాట్లాడితే వారిపై వేటు వేయడానికి వెనుకాడటం లేదు. అది సుజనా చౌదరి కావొచ్చు.. మరెవరైనా కావొచ్చు.
