ఏపీ అధికార పార్టీ వైసీపీ.. వ‌చ్చే ఎన్నిక‌ల‌కు సంబంధించి అభ్య‌ర్థుల‌ను ఎంపిక చేస్తున్న విష‌యం తెలిసిందే. నియోజ‌క‌వ‌ర్గాల వారీగా స‌మ‌న్వ‌య క‌ర్త‌ల‌ను నియ‌మిస్తున్నారు. వీరికే దాదాపు వ‌చ్చే ఎన్నిక‌ల్లో టికెట్ ఇచ్చే అవ‌కాశం క‌నిపిస్తోంది. ఈ క్ర‌మంలో ఉమ్మడి గుంటూరు జిల్లాలోని న‌ర‌స‌రావు పేట పార్ల‌మెంటు స్థానానికి నెల్లూరు నుంచి నాయ‌కుడిని తీసుకువ‌చ్చారు. ప్ర‌స్తుతం నెల్లూరు సిటీ ఎమ్మెల్యేగా ఉన్న మాజీ మంత్రి పోలుబోయిన అనిల్ కుమార్ యాద‌వ్‌ను న‌ర‌స‌రావుపేట పార్లెమంటు స్థానానికి స‌మ‌న్వ‌య క‌ర్త‌గా నియమించారు.
అయితే.. మార్పు మంచిదేన‌ని పార్టీ అధిష్టానం భావించినా.. స్థానికంగా ఉన్న ప‌రిస్థితుల‌ను గ‌మ‌నిస్తే.. మాత్రం అనిల్ కుమార్‌ను తీసుకురావ‌డంపై వైసీపీ ఎమ్మెల్యేల్లోనే పెద‌వి విరుపులు క‌నిపిస్తున్నాయి. `ఈసీటును బీసీల‌కు ఇవ్వాల‌ని అనుకున్నారు. మంచిదే. కానీ, స్థానికంగానే చాలా మంది బీసీ నాయ‌కులు ఉన్నారు. వారిని వ‌దిలేసి.. ఎక్క‌డో నెల్లూరు నుంచి తీసుకురావ‌డం ఎందుకు?` అని ఒక‌రిద్ద‌రు వైసీపీ నాయ‌కులు వ్యాఖ్యానిస్తున్నారు.
ఇక, మెజారిటీ నాయ‌కులు మాత్రం.. `అమ్మో ఆయ‌నో ఫైర్‌బ్రాండ్‌` అని బెంబేలెత్తిపోతున్నారు. త‌మ‌తో కూడా స‌ఖ్య‌త‌గా ఉండ‌ర‌ని.. పైగా ఎన్నిక‌ల ఖ‌ర్చులు కూడా భ‌రిస్తాడో లేదో న‌ని వారు బెంగ‌టిల్లుతున్న ప‌రిస్థితి క‌నిపిస్తోంది. పైగా.. బీసీ అనే ఒక్క ట్యాగ్ త‌ప్ప.. ఆయ‌న లోక‌ల్ కాక‌పోవ‌డాన్ని కూడా వైసీపీ నాయ‌కులు ప్ర‌శ్నిస్తున్నారు. వ‌చ్చే ఎన్నిక‌ల్లో స్థానిక‌త అంశం కూడా ప్ర‌జ‌లు గ‌మ‌నిస్తార‌ని అంటున్నారు.. అప్పుడు ఎంత బీసీ ట్యాగ్ ఉన్నా.. ఫ‌లితం ద‌క్క‌డం క‌ష్ట‌మేన‌ని చెబుతున్నారు.
ఇక, ప్ర‌స్తుతం వైసీపీ స‌మ‌న్వ‌య‌క‌ర్త‌లుగా, ఎమ్మెల్యేలుగా ఉన్న న‌ర‌సారావు పేట పార్ల‌మెంటు నియోజ‌క వ‌ర్గం ప‌రిధిలోని నాయ‌కులు ఈ నియామ‌కంపై పెద‌వి విరుస్తున్నారు. త‌మ‌తో కలివిడిగా ఉంటారా? అనే సందేహాలు వ్య‌క్తం చేస్తున్నారు. పైగా.. స్థానికేత‌రుడు కావ‌డంతో ఆ ప్ర‌భావం ఎక్కువ‌గా ఉంటుంద‌ని అంటున్నారు. ఫైర్ బ్రాండ్ కావ‌డంతో చీటికీ మాటికీ వివాదాల‌కు దిగే మ‌న‌స్త‌త్వం ఉండ‌డంతో చాలా మంది ఆయ‌న అభ్య‌ర్థిత్వాన్ని ఇష్ట‌ప‌డ‌డం లేదు.
ఇదిలావుంటే.. గ‌తంలో పోల‌వ‌రం పూర్తిచేస్తామ‌ని.. అసెంబ్లీలో ప్ర‌గ‌ల్భాలు ప‌లికార‌ని.. కానీ, అది పూర్తి చేయ‌లేద‌ని.. కాబ‌ట్టి ప్ర‌తిప‌క్షాలు ఈ అంశాన్ని ప్ర‌చారం చేసే అవ‌కాశం ఉంద‌ని కూడా సొంత నేత‌లే అభిప్రాయ‌ప‌డుతున్నారు. ఈ ప‌రిణామాల నేప‌థ్యంలోనే న‌ర‌స‌రావుపేట విష‌యంలో సీఎం జ‌గ‌న్ రాంగ్ స్టెప్ వేశారా? అనే చ‌ర్చ సాగుతుండ‌డం గ‌మ‌నార్హం. అదే టైంలో ఇక్క‌డ స్థానిక నేత‌ల స‌హాకారం లేక‌పోతే అనిల్‌కుమార్‌కు క‌ష్టాలు త‌ప్పేలా లేవు.