బాలీవుడ్ లో సల్మాన్ ఖాన్ ఎంత డిమాండ్ ఉంటుందో అందరికీ తెలిసిందే. ఆయన స్టార్ హీరో మాత్రమే కాదు.. ఎన్నో సామాజిక కార్యక్రమాల్లో పాల్గొంటారు. దానితో పాటు పలు టీవీ షోలలోనూ పాల్గొంటుంటారు.
ఇక.. హిందీలో బిగ్ బాస్ షో పాపులర్ అవడంతో పాటు సక్సెస్ అయిందంటే దానికి కారణం సల్మాన్ ఖాన్. దాదాపు 10 సీజన్లకు హోస్ట్ సల్మాన్ ఖానే. 2010 నుంచి ఇప్పటి వరకు సల్మాన్ ఖానే దానికి హోస్ట్ గా వ్యవహరిస్తున్నారు.
ప్రతి సంవత్సరం ఎటువంటి అడ్డంకులు లేకుండా బిగ్ బాస్ షో నడిచినప్పటికీ.. ఈ సీజన్ అంటే బిగ్ బాస్ 14 కి కరోనా అడ్డంకిగా మారింది. ఈసారి సీజన్ ఉంటుందో ఉండదో అని బిగ్ బాస్ అభిమానులు టెన్షన్ పడ్డారు. కానీ.. షూటింగ్ లు గట్రా చేసుకోవడానికి సినీ ఇండస్ట్రీకి ప్రభుత్వం పర్మిషన్ ఇవ్వడంతో వెంటనే బిగ్ బాస్ ను పట్టాలకెక్కించారు.
వచ్చే అక్టోబర్ నుంచి బిగ్ బాస్ సీజన్ 14 ప్రారంభం కానున్నట్టు తెలుస్తోంది. ఇక ఎప్పటిలాగానే హోస్ట్ కోసం సల్మాన్ ఖాన్ ను బిగ్ బాస్ బృందం సంప్రదించిందట. అయితే ఈసారి బిగ్ బాస్ షో కోసం సల్మాన్ ఖాన్ భారీ స్థాయిలో రెమ్యునరేషన్ ను అడిగారట. సీజన్ మొత్తానికి 16 కోట్ల పారితోషకాన్ని సల్మాన్ డిమాండ్ చేశారట. దీంతో బిగ్ బాస్ షో యాజమాన్యం వామ్మో.. అని నోరెళ్లబెట్టారట.
బిగ్ బాస్ సీజన్ 14 కంటెస్టెంట్ల కోసం ఇప్పటికే కొందరు సెలబ్రిటీలను సంప్రదించారట. అయితే కంటెస్టెంట్ల విషయంలో ఇప్పటి వరకు ఎటువంటి అధికారిక ప్రకటన వెలువడనప్పటికీ.. సల్మాన్ ఖాన్ రెమ్యునరేషన్ పైనే సోషల్ మీడియాలో వార్తలు గుప్పుమంటున్నాయి.
నిజానికి బిగ్ బాస్ సీజన్ 4 నుంచి 6 వరకు సల్మాన్ ఖాన్ తీసుకున్నది 2.5 కోట్ల పారితోషకమే. సీజన్ 7 నుంచి 5 కోట్ల రూపాయలు తీసుకున్నారట. ఇలా సీజన్ లతో పాటుగా తన పారితోషకాన్ని కూడా సల్మాన్ పెంచుతూ పోయారు. చివరకు సీజన్ 14 కు ఏకంగా 16 కోట్ల రెమ్యునరేషన్ ను సల్మాన్ డిమాండ్ చేశాడట. బిగ్ బాస్ 13వ సీజన్ కు సల్మాన్ 12 నుంచి 14 కోట్ల పారితోషకం పొందినట్లు తెలుస్తోంది.
అయితే.. గత సీజన్ కు వచ్చిన రెస్పాన్స్, క్రేజ్ ను దృష్టిలో పెట్టుకొని ఈసారి 14 వ సీజన్ లో మరో 5 వారాలు పొడిగించనున్నట్లు సమాచారం. అందుకే.. సల్మాన్ కూడా ఎక్కువ పారితోషకం అడిగి ఉంటారు అంటూ వార్తలు వస్తున్నాయి.
ఏది ఏమైనా బిగ్ బాస్ 14 సీజన్ త్వరలో ప్రారంభం కాబోతున్నది. దాని షూటింగ్ కూడా ముంబైకి సమీపంలోని పన్వేల్ లో ఉన్న సల్మాన్ ఖాన్ ఫామ్ హౌస్ లోనే జరగబోతోంది.