ఎపి ముఖ్యమంత్రి చంద్రబాబుపై వైసిపి ఎమ్మెల్యే కొడాలి నాని తీవ్రస్థాయిలో ధ్వజమెత్తారు. వైసిపిని ‘కోడి కత్తి పార్టీ’గా సిఎం చంద్రబాబు అభివర్ణించడంపై కొడాలి నాని వ్యంగాస్త్రాలు సంధించారు. ‘మాది కోడి కత్తి పార్టీ అయితే…మీది కట్టప్ప కత్తి పార్టీనా?…వెనకాల నుంచి పొడుస్తావా నువ్వు?’ అంటూ కొడాలి నాని దుయ్యబట్టారు. జనసేన అధినేత పవన్ కళ్యాణ్ తనతో కలసి రావాలంటూ సిఎం చంద్రబాబు ఇటీవల చేసిన వ్యాఖ్యలపై కొడాలి నాని ఘాటుగా ప్రతిస్పందించారు. ఒకవైపు పవన్ కళ్యాణ్ చంద్రబాబును పచ్చిబూతులు తిడుతున్నా…చంద్రబాబు మాత్రం పవన్ కళ్యాణ్ మాతో కలసి రావాలని కోరుతున్నారని ఎద్దేవా చేశారు.
చంద్రబాబు ఎలాగోలా అధికారంలోకి రావాలని, అందుకోసం ఎవరో ఒకరితో పొత్తు పెట్టుకోవాలనే ప్రయత్నం చేస్తున్నారని కొడాలి నాని విమర్శించారు. చంద్రబాబు రాజకీయ అనుభవం 40 సంవత్పరాలయితే జగన్ వయస్సు కేవలం నలభై ఏళ్లు మాత్రమేనని కొడాలి నాని గుర్తు చేశారు. అయితే జగన్ దమ్మున్న లీడర్ కాబట్టి ఎవరితో పొత్తులు లేకుండా ఒంటరిగా పోటీచేస్తున్నాడని చెప్పుకొచ్చారు.