“పోలీసులు అలా కనిపిస్తారు కానీ… సైలెంట్ గా చేయాల్సిన పని చేస్తారు. అధికార పార్టీ వాళ్ళు అయినా.., బయటి వాళ్ళు అయినా పాపానికి ఒడికడితే ఊరుకునేది లేదు. అందుకే పవన్ ఒక ఆరోపణ చేసారు. దీనిలో వాస్తవం ఎంతో తేలాల్సిందే అని ప్రభుత్వం- పోలీసులు ఒక నిఘా పెట్టారు. కొడాలి మనుషులు దొరికారు. ఇది కూడా నాన్ – లోకల్ పోలీసులు చేసిన ప్రత్యేక ఆపరేషన్” దీని పూర్తి వివరాలు “న్యూస్ ఆర్బిట్” ప్రత్యేకంగా అందిస్తుంది..!
గుడివాడ నియోజకవర్గం పేకాటకి అడ్డాగా మారింది అంటూ పవన్ కళ్యాణ్ ఆరోపణలు చేసారు. దీని నుండి పెద్దోళ్ళకు వాటాలు ఉన్నాయి అంటూ కొడాలి నానిపైకి బురద వేశారు. దాన్ని కొడాలి నాని తుడిచేసుకున్నారు. టీడీపీ హయాంలోనే భారీగా పేకాట జరిగేది, ఇప్పుడు లేదు అంటూ ఆ బురదని టీడీపీపైకి, పవన్ పైకి విసిరారు. దీన్ని మొత్తం గమనించిన పోలీసు ఉన్నతాధికారులు ఒక ప్రత్యేక నిఘా పెట్టారు. కొడాలి నాని లేదు, ఎవరూ లేదు… పేకాట జరిగితే పట్టుకోవాల్సిందే అంటూ గట్టి ఆదేశాలిచ్చారు. అందుకు గుడివాడ పోలీసులు వెనకడుగు వేశారు. తరచూ చూడడం ఏమి లేదు, ఏమి లేదు.. అసలు పేకాట లేదు అంటూ ఉన్నతాధికారులకు చెప్పడంతో వారు చేతులు దులుపుకున్నారు. కానీ ఉన్నతాధికారుల దగ్గర పక్కాగా సమాచారం ఉంది. అందుకే..!
ఏలూరు పోలీసులతో ప్రత్యేక నిఘా..!!
గుడివాడ పోలీసుల వల్ల కాలేదు. అందుకే ఏలూరు పోలీసులు గట్టిగా నిఘా పెట్టారు. ఏలూరు డీఐజీ ప్రత్యేక ఆదేశాలతో 30 మంది పోలీసులతో ఒక ప్రత్యేక బృందం గుడివాడ పరిసరాల్లో నిఘా ఉంచింది. దీంతో గుట్టు రట్టయింది. పశ్చిమ గోదావరి జిల్లా స్పెషల్ ఎన్ఫోర్స్మెంట్ బ్యూరో అదనపు ఎస్పీ జయరామరాజు ఆధ్వర్యంలో పోలీసులు నిన్న రాత్రి దాడులు చేశారు. గుడివాడ డిఎస్పీ ఆఫీస్ కి 8 కిలోమీటర్ల దూరంలోనే కొడాలి నాని కజిన్ కి చెందిన ఒక అడ్డాలో వారు అనుచరులు నిర్వహిస్తున్న ఒక పేకాట అడ్డా బయటకు వచ్చింది. 32 మందిని పోలీసులు అదుపులోకి తీసుకున్నారు.
41 వాహనాలుతో భారీగా..!!
ఇక్కడ పేకాట ఎంతగా జరుగుతుంది అంటే… పోలీసుల దాడుల్లో 41 వాహనాలు దొరికాయి. వాటిలో 28 కార్లు, 13 ద్విచక్ర వాహనాలు ఉన్నాయి. నగదు లెక్కించే యంత్రాలు 2 దొరికాయి. వీటితో పాటూ రూ. 55 లక్షలు భారీగా నగదు కూడా పోలీసులకు దొరికింది. పారిపోయిన వాళ్ళు పారిపోగా 32 మంది పోలీసులకు చిక్కారు. ఇది మొత్తం కొడాలి నాని ప్రధాన అనుచరులు నిర్వహిస్తున్నారు అని పోలీసులు నిర్ధారించారు. సో.. దీంతో పవన్ ఆరోపణలు నిజమని తేలిపోయింది. గుడివాడ పోలీసులు చేతులెత్తేశారు. ఏలూరు పోలీసులు పని కానిచ్చారు. మొత్తానికి ఈ వ్యవహారంతో కొడాలి నాని రాజకీయంగా బుక్ అయినట్టే..!!