Telangana NewsOrbit: స్టేషన్‌ఘన్‌పూర్ బీఆర్ఎన్ నేతల మధ్య పంచాయతీ ప్రగతి భవన్ కు చేరింది. ఎమ్మెల్యే రాజయ్య, ఎమ్మెల్సీ కడియం శ్రీహరి మద్య ఆరోపణలు, ప్రత్యారోపణల యుద్దం బీఆర్ఎస్ కు తలనొప్పిగా మారింది. ఈ నేపథ్యంలో ఎమ్మెల్యే రాజయ్యను ప్రగతి భవన్ కు పిలిపించిన మంత్రి కేటిఆర్ ..కడియంపై చేసిన వ్యాఖ్యలకు వివరణ తీసుకున్నట్లు తెలిసింది. ఇదే క్రమంలో మరో సారి ఇలాంటివి రిపీట్ కావద్దంటూ రాజయ్యకు మంత్రి కేటిఆర్ హెచ్చరించినట్లుగా వార్తలు వచ్చాయి. పార్టీ అంతర్గత గొడవల వల్ల ప్రభుత్వం, పార్టీకి నష్టం జరిగే అవకాశం ఉంటుందని హెచ్చరించినట్లు తెలుస్తొంది. కాగా ఎమ్మెల్యే రాజయ్య ముఖ్యమంత్రి కేటిఆర్ ను కలిసేందుకు ప్రగతి భవన్ లో వేచి ఉన్నా అపాయింట్మెంట్ లభించకపోవడంతో వెనుతిరిగినట్లు సమాచారం. వచ్చే ఎన్నికల్లో టికెట్ మళ్లీ కేటాయిస్తారా లేదా అన్న గందరగోళంలో రాజయ్య ఉన్నట్లు ప్రచారం జరుగుతోంది.
ఎమ్మెల్యే రాజయ్య – ఎమ్మెల్సీ కడియం శ్రీహరి ఒకరిపై ఒకరు తీవ్ర స్థాయిలో ఆరోపణలు, విమర్శలు బహిరంగంగా చేసుకుంటున్నారు. ఈ క్రమంలో కడియం శ్రీహరిపై రాజయ్య మాటల దాడి మరింత పెంచారు. టీపీసీసీ అధ్యక్షుడు రేవంత్ రెడ్డిని కడియం శ్రీహరి కలిశారనీ, తనతో పాటు తన కుమార్తె కావ్యకు కూడా కాంగ్రెస్ పార్టీ టికెట్ అడిగారనీ, త్వరలోనే ఆధారాలు బయటపెడతాననీ కూడా అన్నారు. దానికి తోడు కడియం కులాన్ని తీసి మరీ విమర్శలు చేశారు. కడియం పద్మశాలీ కులానికి చెందిన వాడనీ, కానీ 60 ఏళ్లుగా రిజర్వేషన్లు అక్రమంగా పొందుతున్నారని ఆరోపించారు. వేల కోట్ల రూపాయల అక్రమ ఆస్తులు కూడా కడియంకు ఉన్నాయని కూడా ఆరోపించారు. రాజయ్య ఆరోపణలను కడియం శ్రీహరి ఖండించారు. తనకు ఎక్కడెక్కడ ఆస్తులు ఉన్నాయో అధారాలతో సహా తీసుకువస్తే స్టేషన్ ఘన్ పూర్ దళిత సోదరులకు రాసి ఇస్తానని చెప్పారు. తండ్రి కులమే పిల్లలకు వర్తిస్తుందని సుప్రీం కోర్టు చెప్పిన విషయాన్ని గుర్తు చేశారు. తాను అక్రమంగా రిజర్వేషన్ పొందలేదన్నారు.
తనపై రాజయ్య నిరాధార ఆరోపణలు చేస్తున్నారని మండిపడ్డారు కడియం శ్రీహరి. మరో పక్క రాజయ్యపైనా ఆరోపణలు చేశారు. దళిత బంధులో ఎమ్మెల్యే రాజయ్య కమిషన్లు దండుకున్నారనీ, బీఫామ్ లు అమ్ముకున్నారని ఆరోపించారు. ఇలా ఇద్దరు పార్టీ లైన్ దాటి మరీ పరస్పర విమర్శలు చేసుకోవడం రాజకీయ వర్గాల్లో హాట్ టాపిక్ అయ్యింది. ఈ నేపథ్యంలో మంత్రి కేటిఆర్ స్పందించి రాజయ్యకు క్లాస్ పీకడం జరిగింది. దీంతో అయినా స్టేషన్ ఘన్ పూర్ లో ఇద్దరు నేతలు కామ్ గా ఉంటారా అనేది వేచి చూడాలి.