Ambati Rayudu – Pawan Kalyan: టీమిండియా మాజీ క్రికెటర్ అంబటి రాయుడు మరో ట్విస్ట్ ఇచ్చారు. అంబటి రాయుడు వైసీపీలో చేరిన పది రోజుల వ్యవధిలోనే పార్టీని వీడుతున్నట్లు ప్రకటించి సంచలనం సృష్టించారు. ఆ మరుసటి రోజే వైసీపీకి రాజీనామా చేయడానికి కారణాన్ని కూడా ట్విట్టర్ వేదికగా వెల్లడించారు అంబటి రాయుడు. క్రికెట్ ఆడటం కోసం రాజకీయాలకు దూరంగా ఉండాల్సిన అవసరం ఉందని పేర్కొన్నారు. 
త్వరలో దుబాయ్ లో జరగనున్న ఇంటర్నేషనల్ టీ 20 లీగ్ లో ఆడనున్నట్లు వెల్లడించారు. ప్రొఫెషన్ క్రికెట్ లీగ్ లో ఆడాలంటే ఏ రాజకీయ పార్టీతో అనుబంధం ఉండకూడదని వెల్లడించారు. అయితే అనూహ్యంగా ఇవేళ జనసేన అధినేత పవన్ కళ్యాణ్ తో అంబటి రాయుడు భేటీ కావడం రాజకీయ వర్గాల్లో హాట్ టాపిక్ అయ్యింది. మంగళగిరి జనసేన పార్టీ కార్యాలయంలో ఇరువురి మధ్య దాదాపు గంటకు పైగా చర్చలు జరుగుతున్నాయి. 
పవన్ కళ్యాణ్ తో అంబటి రాయుడు భేటీ కావడంతో మరల యూటర్న్ తీసుకున్నారా అనే ప్రశ్న ఉదయిస్తొంది. రాబోయే ఎన్నికల్లో గుంటూరు లోక్ సభకు పోటీ చేయాలన్న ఆలోచనతోనే అంబటి రాయుడు గత కొంత కాలంగా నియోజకవర్గ పరిధిలో పర్యటనలు చేశారని టాక్ నడుస్తొంది. వైసీపీ అధిష్టానం కూడా గుంటూరు పార్లమెంట్ స్థానంపై హామీ ఇవ్వడంతోనే వైసీపీలో చేరారని ప్రచారం జరిగింది. అయితే నరసరావుపేట ఎంపీగా ఉన్న లావు శ్రీకృష్ణదేవరాయలు ను గుంటూరు లోక్ సభ స్థానం నుండి పోటీ చేయాలని వైసీపీ అధిష్టానం సూచిస్తున్న నేపథ్యంలో ఈ నెల 6వ తేదీన వైసీపీని వీడుతున్నట్లు అంబటి రాయుడు ప్రకటించారు.
పవన్ తో అంబటి రాయుడు భేటీలో రాజకీయ ప్రాధాన్యత ఉందా లేదా అనేది తెలియాలి అంటే వారి నుండి ప్రకటన వచ్చే వరకూ ఆగాల్సిందే. వీరి భేటీకి సంబంధించి అటు జనసేన పార్టీ గానీ, ఇటు అంబటి రాయుడు గానీ అధికారింగా ఎటువంటి సమాచారం విడుదల చేయలేదు. అంబటి రాయుడు జనసేన పార్టీలో చేరనున్నట్లుగా సోషల్ మీడియా లో ప్రచారం జరుగుతోంది.
YSRCP: రాజ్యసభకు ఆ ముగ్గురు .. వైవీతో పాటు ఆ ఇద్దరికీ ఛాన్స్..?