Robo sweat : అదేంటి రోబోలకు చెమటలు పట్టడమా? సాధారణంగా మనుషులకు చెమటలు పట్టడం మనం వినే ఉన్నాం. కానీ రోబోలకు చెమటలు పట్టడం ఏంటి? వినడానికే ఎంతో ఆశ్చర్యంగా ఉన్నా ఇది నిజం. అమెరికాకు చెందిన శాస్త్రవేత్తల బృందం ఎన్నో పరిశోధనల తర్వాత చెమట పట్టే రోబోలను సృష్టించారు. సాధారణంగా మనిషికి చెమటలు పట్టడం వల్ల ఉష్ణోగ్రతలు తగ్గి సాధారణ స్థితికి రావడంతో మనిషి అపాయం నుంచి కోలుకుంటాడు. అదే విధంగా అధిక ఉష్ణోగ్రతలకు గురైన రోబోలలో తరచూ సమస్యలు తలెత్తడం వల్ల చెమటలు పట్టే రోబోలను సృష్టించారు శాస్త్రవేత్తలు.
న్యూయార్క్‌లోని కార్నెల్‌ యూనివర్సిటీకి చెందిన శాస్త్రవేత్తల బృందం ఎన్నో పరిశోధనలు చేసే స్మార్ట్ రోబోలకు సరిపడే చేతివేళ్లను సృష్టించారు. ఈ స్మార్ట్ రోబోల చేతివేళ్ళపై సన్నని రంధ్రాలు ఉంటాయి. ఈ రోబోలు అధిక ఉష్ణోగ్రతలకు గురైనప్పుడు ఆ రంధ్రాల గుండా చెమటలు వచ్చి రోబో చల్లబడుతుంది. ఈ ఉష్ణోగ్రతలకు అనుగుణంగా ఉండటం కోసం రోబో చేతి వేళ్లలో అతి మెత్తని మైనాన్ని ఉపయోగించి తయారు చేశారు.ఈ రోబో చేతివేళ్ళపై కంటికి కనిపించని చిన్న రంధ్రాలు ఏర్పాటు చేసి ఉన్నారు అధిక ఉష్ణోగ్రతలకు గురైనప్పుడు మైనం లోపల నుంచి నీరు ఆ రంధ్రాల ద్వారా చెమట రూపంలో బయటకు వస్తుంది. దీంతో రోబోల వేళ్ళు చల్లబడతాయి.
అయితే రోబో చేతివేళ్లలో అమర్చిన మైనం ఎప్పుడూ తడిగా ఉండడం కోసం శాస్త్రవేత్తలు ‘మల్టీ మెటీరియల్‌ స్టీరియో లితోగ్రఫీ’ అనే 3d ప్రింటింగ్ సాంకేతికతను ఉపయోగించారు. దీని ద్వారా రోబోలు మధ్యలో ఆగిపోకుండా నిరంతరం పని చేయడానికి వీలవుతుంది. అయితే ఈ రోబోల చేతి వేళ్ళు చెమట పట్టడం ద్వారా అవి పట్టుకున్న వస్తువులు జారిపోయే ప్రమాదం ఉంటుంది. ఈ సమస్యను అధిగమించడానికి మరింత అధ్యయనం చేసి మరింత సాంకేతిక రోబోలను రూపొందిస్తామని కార్నెల్‌ యూనివర్సిటీ అసోసియేట్‌ ప్రొఫెసర్‌ రాబ్‌ షెఫర్డ్‌ ఈ సందర్భంగా తెలియజేశారు.