ఆలస్యంగా నిద్రలేచి హడావిడి గా అరుపులతో కేకలతో పిల్లలను స్కూల్ దగ్గర దింపి, తరువాత ఆఫీస్ కి టైం కి వెళ్లలేక బాస్‌తో మాటపడ్డ సందర్భాలు చాలా మందికి ఎదురయ్యే ఉంటాయి. వీటినుండి బయట పడాలంటే మీ దిన చర్యలో ఉదయం నిద్ర మేల్కొనటం అనేది చాల అవసరం.. రాత్రి తొందరగా పడుకుంటే పొద్దున్న తొందరగా లేవడం తేలికగా జరిగే పని.
కాబట్టి రోజూ పడుకునే టైమ్ కంటే ఒక పావు గంట ముందు పడుకుని ఒక పావు గంట ముందుగా లేవడం మొదలుపెట్టండి. ఇది కరెక్ట్ గా జరగాలంటే…పడుకోవడానికి గంట ముందు నించే లైట్స్ ఆఫ్ చేసి, ఫోన్/లాప్టాప్ పక్కన పెట్టేయండి. నిద్ర పోవడానికి అరగంట ముందు వెచ్చగా పాలు తాగడం మంచి నిద్రవచ్చేలాగా చేస్తుంది. అలారం మీకు కొంచెం దూరంగా పెట్టుకుంటే అలారం ఆపేటప్పటికి మెలకువ వచ్చేస్తుంది.
ఆదివారం, సోమవారం తో సంబంధం లేకుండా ఇదే రొటీన్ కొన్ని రోజులపాటు క్రమం తప్పకుండ ఆచరించడానికి ప్రయత్నం చేయండి. మీకు బాగాసంతోషాన్ని ఇచ్చే పనిని పొద్దున్నే లేవగానే చేసుకోండి. కర్టెన్స్ పక్కకు జరిపి సూర్యకిరణాలు, మంచి గాలి లోపలి వచ్చేవిధంగా చేయండి. ఆ తరువాత బ్రష్ చేసుకుని ముఖం చల్లని నీటితో కడుక్కున్నారంటే నిద్ర పూర్తిగా పోతుంది. అప్పుడు వేడిగా కాఫీ కానీ, నిమ్మ రసం పిండిన వేడి నీరు కానీ తాగితే ఫ్రెష్ గా ఉంటుంది.
పొద్దున్నే లేవడం వల్ల ఎంత టైం మిగిలిందో ఎంత ప్రశాంతంగా గడపగలిగారో, ఆ టైం లో మీరెన్ని పనులు చేయగలుగుతున్నారో.. గమనించుకుంటూ ఉండండి. ఇది మీకు మంచి ఉత్సాహాన్ని,శక్తినిస్తుంది.ఇంకో ముఖ్యమైన చిట్కా మీరు రాత్రి పడుకునేటప్పుడు ఉదయం ఎన్ని గంటలకు లేవాలనుకుంటున్నారో ఆ టైం ని మీరు మీ దిండు తోమూడుసార్లు నెమ్మదిగా తడుతూ చెప్పి పడుకోండి…తప్పకుండా మెలకువ వచ్చితీరుతుంది.నమ్మరా అయితే ప్రయత్నం చేసి చూడండి.