YSRCP: జనసేన పార్టీకి బిగ్ షాక్ ఇచ్చారు మాజీ ఎంపీ చేగొండి హరిరామజోగయ్య కుమారుడు సూర్యప్రకాష్. ఆయన జనసేన పార్టీకి గుడ్ బై చెప్పి ఇవేళ వైసీపీలో చేరారు. శుక్రవారం సాయంత్రం తాడేపల్లి సీఎం క్యాంప్ కార్యాలయానికి వచ్చిన సూర్యప్రకాష్ .. సీఎం వైఎస్ జగన్ సమక్షంలో వైసీపీ కండువా కప్పుకున్నారు. అనంతరం ఆయన మీడియాతో మాట్లాడారు. జనసేనాని తీరుపై విమర్శలు గుప్పించారు.
పార్టీ నేతలతో కూడా మాట్లాడే సమయం పవన్ కు లేదా అని ప్రశ్నించారు. కనీసం పార్టీ బూత్ కమిటీలను ఏర్పాటు చేయలేరా అని పవన్ ను నిలదీశారు. ఆరేళ్లలో తాను అరగంట మాత్రమే పవన్ తో మాట్లాడానని అన్నారు. పార్టీ బలోపేతం చేసే ప్రయత్నం పవన్ కళ్యాణ్ ఏ మాత్రం చేయకపోగా, చంద్రబాబును సీఎం చేయాలనే ఆరాటపడ్డారని అన్నారు. సామాజిక న్యాయం గురించి పవన్ కు ఏమాత్రం తెలియదని, జనసేనలో మాట్లాడే స్వేచ్చ ఉండదని అన్నారు.
సలహాలు ఇచ్చే వారిని వైసీపీ కోవర్టులంటూ పవన్ బహిరంగంగా అన్నారని అన్నారు. పవన్ ఏమి ఆశించి పార్టీ పెట్టారో ఆయనకే క్లారిటీ లేదని అన్నారు. మనసు చంపుకుని పార్టీలో ఉండలేక ఇవేళ పార్టీ ప్రాధమిక సభ్యత్వానికి, పదవికి రాజీనామా చేసినట్లు తెలిపారు. బేషరతుగా వైసీపీలో చేరినట్లు చెప్పారు. క్రమశిక్షణ గల నేతగా వైసీపీ కోసం పని చేస్తానని తెలిపారు.
గత కొంత కాలంగా చేగొండి సూర్యప్రకాష్ తండ్రి, కాపు సంక్షేమ సంఘం అధ్యక్షుడు చేగొండి హరిరామ జోగయ్య పవన్ కళ్యాణ్ కు బహిరంగ లేఖలు రాస్తున్న సంగతి తెలిసిందే. టీడీపీ పొత్తులో భాగంగా 40 నుండి 60 అసెంబ్లీ స్థానాలు తీసుకోవడంతో పాటు రెండున్నరేళ్లు ముఖ్యమంత్రి పదవి తీసుకోవాలని, జనసేన అభిమానుల కోరిక మేరకు ఆలా చేస్తేనే జనసేన, టీడీపీ మధ్య ఓటు ట్రాన్సఫర్ సక్రమంగా జరుగుతుందని హరిరామ జోగయ్య సూచించారు.
అయితే పొత్తులో భాగంగా జనసేన 24 సీట్లు మాత్రమే తీసుకోవడంపై హరిరామ జోగయ్య తీవ్ర స్థాయిలో మండిపడ్డారు. పవన్ కళ్యాణ్ తన ప్రసంగంలో సలహాలు ఇచ్చే వాళ్లు కాదని, పార్టీ కోసం పోరాడే వాళ్లు కావాలని అనడం కూడా వీరి ఆగ్రహానికి కారణమై ఉండవచ్చని భావిస్తున్నారు. ఈ క్రమంలోనే చేగొండి సూర్యప్రకాష్ జనసేనను వీడి వైసీపీలో చేరారు.
చేగొండి సూర్యప్రకాశ్ జనసేనలో 2018లో చేరారు. ఆయనను పవన్ కళ్యాణ్ 2022లో పీఏసీ మెంబర్ గా నియమించారు. సూర్యప్రకాశ్ జనసేన నేతగా ఆచంట నియోజకవర్గంలో పని చేస్తూ ఉండేవారు. అయితే తన సీటుపై పవన్ కళ్యాణ్ క్లారిటీ ఇవ్వకపోవడంతో సూర్యప్రకాశ్ పార్టీ పట్ల అసంతృప్తితో ఉన్నారు. ఈ క్రమంలో వైసీపీలో చేరితే ఏదో ఒక నియోజకవర్గం నుండి పోటీ చేసే అవకాశం లభిస్తుందన్న అంచనాతో జాయిన్ అయినట్లు తెలుస్తొంది.
YS Sunitha: వైఎస్ సునీత సంచలన కామెంట్స్ కు వైసీపీ నేత సజ్జల కౌంటర్ ఇలా