కాంగ్రెస్ ఎంపీ రేవంత్ రెడ్డి కొత్త పార్టీ పెట్టబోతున్నారంటూ ఇటివల వార్తలు వస్తున్నాయి. మూడు సంవత్సరాలుగా తెలంగాణ కాంగ్రెస్ లో కీలకంగా మారిన రేవంత్ కు వేరు కుంపటి పెట్టుకునే ఆలోచన ఎందుకు వచ్చినట్టు.. కాంగ్రెస్ లో వచ్చిన కష్టమేంటి.. పార్టీ పెడితే నెగ్గుకురాగలరా.. రేవంత్ చరిష్మా ఎంతవరకూ పని చేస్తుంది.. రేవంత్ వాగ్దాటి ఎలాంటి ఫలితాలనిస్తుంది.. అనే ప్రశ్నలు ఉత్పన్నమవుతున్నాయి.
అసలు పార్టీ పెట్టాలనే ఆలోచన ఎందుకంటే..
కాంగ్రెస్ పార్టీ సముద్రం లాంటిది. ఎవరికి వారే స్వేచ్చగా ఉంటూ తమ వాదన వినిపిస్తూ ఉంటారు. తెలంగాణ కాంగ్రెస్ లో ఉన్న వారందరూ సీనియర్ నాయకులే. వీహెచ్ హనుమంతరావు, ఉత్తమ్ కుమార్ రెడ్డి, కోమటిరెడ్డి బ్రదర్స్, షబ్బీర్ అలీ, భట్టి విక్రమార్క.. పార్టీని నమ్మినవారు ఉన్నారు. వీరందరిలోకి రేవంత్ రెడ్డి జూనియర్. ఆయనకు వాగ్దాటి ఎక్కువ.. శాసించడం తెలుసు.. అయినా.. రేవంత్ రెడ్డి సీనియర్లతో నెగ్గుకురాలేక పోతున్నారు. రేవంత్ స్పీడును సీనియర్లు అందుకోలేక పోతున్నారు. దీంతో రేవంత్ పై ఎంతోకొంత అసంతృప్తి గళం వినిపిస్తూ ఉంటారు. దీంతోపాటు కాంగ్రెస్ అధిష్టానంపై రేవంత్ కు కూడా నమ్మకం పోయిందని అంటున్నారు. సోనియా. రాహుల్ నాయకత్వంపై రేవంత్ కు ఆశలు లేవనే వార్తలు కూడా వస్తున్నాయి. దీంతో తెలంగాణలో టీఆర్ఎస్ ప్రభుత్వంపై పోరాటానికి కాంగ్రెస్ కలిసి రావట్లేదనే అభిప్రాయానికి వచ్చినట్టు తెలుస్తోంది. దీంతో రేవంత్ సొంత పార్టీ పెట్టుకోవాలనే ఆలోచన చేస్తున్నారని అంటున్నారు. సొంతపార్టీ ఉంటే తానే శాసనకర్తగా ఉండడం.. పార్టీని తాను అనుకున్న విధంగా నడిపించడం.. చేయొచ్చని భావిస్తున్నారట.
పార్టీ పెడితే ఎలా నెగ్గుకొస్తారో..
రేవంత్ పార్టీ పెడితే కొంత తెలంగాణలో మద్దతు దక్కే అవకాశాలు ఉంటయని అంటున్నారు. మొత్తం 119 నియోజకవర్గాల్లో 40 నుంచి 50 స్థానాల్లో రేవంత్ కు బలగం ఉందని అంటున్నారు. దీనిపై సొంత వారితో ఒక ఐటీ టీమ్ తో ఇప్పటికే సర్వే చేయించినట్టు తెలుస్తోంది. 31 జిల్లాలకు గానూ 22 జిల్లాల్లో సర్వే పూర్తైనట్టు తెలుస్తోంది. ఈ సర్వేలో పార్టీ పెడితేనే బాగుంటుందని సర్వే వివరాలు వెల్లడైనట్టు కూడా తెలుస్తోంది. గతంలో టీడీపీ బలంగా ఉన్న కరీంనగర్, నల్గొండ, మెదక్, రంగారెడ్డి,.. జిల్లాల్లో అనుకూలంగా వచ్చినట్టు తెలుస్తోంది. హైదరాబాద్ లోని తెలుగుదేశం పార్టీ మద్దతు కూడా రేవంత్ కు ఇస్తామని చెప్పినట్టు తెలుస్తోంది. ఈ నేపథ్యంలోనే రేవంత్ కొత్త పార్టీ పెట్టే యోచనలో ఉన్నట్టు సమాచారం.
