Covid N440K Facts: కరోనా వంటి విపత్కర వేళల్లో సంయమనం.., సహనం పాటించాల్సిన సోషల్ మీడియాలు, డిజిటల్ మీడియాలు, కొన్ని అసలు మీడియాలు కూడా ఆ విలువలు, ఆ సంయమానాలు కోల్పోయి పేరు కోసం, సంచలనం కోసం తాపత్రయపడుతున్నాయి.. ఈ క్రమంలోనే రెండు రోజుల నుండీ “ఏపీలో కొత్త కరోనా వైరస్ ఎన్ 440కె వైరస్ విలయతాండవం అంటూ కొన్ని షార్ట్ న్యూస్ యాప్స్, కొన్ని డిజిటల్ మీడియాల్లో వచ్చాయి. వీటిపై ఏపీలో ఆరోగ్య శాఖ అధికారులు దృష్టి పెట్టారు. అటువంటి వార్తలను నమ్మవద్దని తేల్చిచెప్పారు.
Covid N440K Facts: అటువంటి వైరస్ లేదు : జవహర్ రెడ్డి..!!
కరోనా విపత్కర పరిస్థితుల్లో ప్రజల్ని భయబ్రాంతులకు గురి చేయొద్దని ఏపీ స్టేట్ కోవిడ్ కమాండ్ కంట్రోల్ ఛైర్మన్‌ కేఎస్‌ జవహర్ రెడ్డి పేర్కొన్నారు. రాష్ట్రంలో అసలు ఎన్440కే వైరస్ లేదన్నారు. రాష్ట్రంలో ఈ వైరస్ తీవ్రంగా ఉన్నట్టు ఎలాంటి నిర్థారణ జరగలేదని.. అందుకు సంబంధించిన పరిశోధన డేటా కూడా ఏమీలేదని తెలిపారు. “మన రాష్ట్రం నుండి నెల నెలా సీపీఎంబీకి 250 నమూనాలు పంపుతాం. ఏపీ, తెలంగాణ, కర్ణాటకల నుండి నమూనాలను జన్యు శ్రేణి పరీక్షల కోసం సీసీఎంబీ హైదరాబాద్‌కి కూడా వెళ్తున్నాయి. ఎన్ 440కె (బి.1.36) అనే వైరస్ దక్షిణ భారత దేశం నుండి వెళ్లిన నమూనాల్లో గుర్తించారు. కానీ అది మనది కాదు. 2020 జున్‌, జూలై నెలల్లో ఏపీ, తెలంగాణ, కర్ణాటక నుంచి వెళ్లిన నమూనాల్లో మాత్రమే గుర్తించారు. దాని ప్రభావం గత డిసెంబర్, ఈ ఏడాది జనవరి, ఫిబ్రవరి నెలల్లో మాత్రం ఉంది. ఇప్పుడు లేదు. కానీ మార్చి నెలలో అది పూర్తిగా అంతర్థానమైంది, ఇప్పుడు దాని ప్రభావం చాలా స్వల్పం. ప్రస్తుతం బి1.167, బి.1 వైరస్ స్ట్రెయిన్‌ల ప్రభావం మాత్రమే మన రాష్ట్రాల్లో ఎక్కువగా ఉందన్నారు.