గ్రేటర్ ఎన్నికల నేపథ్యంలో టిఆర్ఎస్ పార్టీ నాయకురాలు ఎమ్మెల్సీ కవిత తెలంగాణ బిజెపి అధ్యక్షుడు బండి సంజయ్ పై ఘాటు వ్యాఖ్యలు చేశారు. సీరియస్గా ఎన్నికలు జరుగుతున్న సమయంలో ప్రజలు నవ్వుకోవడానికి బండ్ల గణేష్ స్థానంలో బండి సంజయ్ వచ్చారంటూ ఎద్దేవా చేశారు. చివరి ఎన్నికల సమయంలో బండ్ల గణేష్ చాలా కామెడీ చేశారని, కానీ ఈసారి బండి సంజయ్ చేస్తున్న వ్యాఖ్యలు ఆ తరహాలోనే ఉన్నాయి అంటూ కవిత వ్యాఖ్యానించారు.
దీంతో కవిత చేసిన కామెంట్లకు బండ్ల గణేష్ సోషల్ మీడియాలో స్పందించి కౌంటర్ వేశారు. ‘తాను జోకర్ కాదని.. ఫైటర్’ అని గట్టి కౌంటర్ ఇచ్చారు. అలాగే ప్రస్తుతం తనకు రాజకీయాలతో సంబంధం లేదని ట్వీట్ చేశారు. 2018 ముందస్తు ఎన్నికలకు టిఆర్ఎస్ పార్టీ వెళ్ళిన సంగతి తెలిసిందే. ఆ సమయంలో కాంగ్రెస్ పార్టీలో ఉన్న బండ్లగణేష్.. తీవ్రస్థాయిలో టిఆర్ఎస్ పార్టీపై కామెంట్లు చేయడం జరిగింది.
ఖచ్చితంగా కాంగ్రెస్ పార్టీ గెలుస్తుందని లేకపోతే కెమెరా ముందు సెవన్ ఓ క్లాక్ బ్లేడ్ తో పీక కోసుకుంటాను అని చెప్పుకొచ్చారు. అయితే టిఆర్ఎస్ పార్టీ గెలవడంతో బండ్ల గణేష్ చేసిన ఛాలెంజ్ గురించి మీడియా ఛానల్ లు అతని సంప్రదించాలని చూడగా చాలావరకు ఆయన అజ్ఞాతంలోకి వెళ్లిపోయారు. దీంతో పొలిటికల్ గా బండ్ల గణేష్ కి ఆయన చేసిన వ్యాఖ్యలు బాగా డ్యామేజ్ చేశాయి. పరిస్థితులు ఇలా ఉండగా కవిత తాజాగా తనపై చేసిన వ్యాఖ్యలకు సీరియస్ గా బండ్ల గణేష్ ప్రతిస్పందించి నేను జోకర్ ని కాదు ఫైటర్ అని తెలపడంతో.. గణేష్ చేసిన కామెంట్లు సోషల్ మీడియాలో వైరల్ అవుతున్నాయి.
