ముకేశ్ అంబానీ.., ఆయన నీడ నత్వాని ఇద్దరూ ఈ మధ్య ఏపీకి బాగా దగ్గరైన పేర్లు…! అప్పుడెప్పుడో 40 రోజుల కిందట సీఎం జగన్ ని కలిశారు, కష్ట సుఖాలు మాట్లాడారు, రాజ్యసభ టికెట్ అడిగారు, జగన్ కరుణించారు, సీటు ఖరారు చేసారు. తన పార్టీ వారిని కాదని, నమ్మిన వారిని సొంత బాబాయిని కాదనుకుని నత్వానికి సీటు ఇచ్చేసారు. ఇక్కడ వరకు బాగానే ఉంది. మరి అంబానీతో సఖ్యత కుదిరింది కదా, రిలయన్స్ తో కయ్యం ఎందుకు అనుకుని… రిలయన్స్ పై దాడుల కేసులను ఎత్తేసారు. అలా అలా ముకేసుడితోనూ, ఆయన నీడ నత్వానితోనూ జగనుకి, ఏపీకి సాన్నిహిత్యం బాగానే ఏర్పడింది.
కరుణ చూపవయా…!
మరి ఇప్పుడెందుకు వీళ్లిద్దరి విషయం అనుకుంటున్నారేమో… అదే చూద్దాం…! ఏపీకి ఇప్పుడు తక్షణం ఏమవసరం అంటే చిన్న పిల్లగాడు కూడా చెప్పేది డబ్బు అని. జగన్ నుండి రాష్ట్ర పెద్దల వరకు అందరూ పదేపదే సాయం కోసం అభ్యర్థిస్తున్నారు. రాష్ట్రం కష్టాల్లో ఉంది ఆదుకోవాలంటూ ప్రకటనలిస్తున్నారు. దాతలూ కొంత వరకు స్పందిస్తున్నారు. తోచిన సాయం చేస్తున్నారు. మరి ఆ అంబానీ ఏమైపోయినట్టు? ఆయన నీడ నత్వాని ఏమైపోయినట్టు…? అంబానీ లక్షల కోట్ల ఆస్తి పరుడు. నత్వాని కూడా వేల కోట్ల ఆస్తి పరుడు. మరి ఇప్పుడేంటి ఇటు చూడట్లేదు. రాజ్యసభలో సీటు కోసం అవసరమైన రాష్ట్రం, అవసరార్ధం లో ఉంటె కనిపించలేదా? వేల కోట్లలో కనీసం యాభయ్యో, వందో … అదీ లేదంటే ఒక పాతికైనా ఇటు వేసేస్తే రాష్ట్రానికి చేదోడుగా ఉంటుంది, జగన్ కి తన నిర్ణయంపై నమ్మకం ఏర్పడుతుంది, జనాలకు కూడా నత్వానిపై ఒక అభిప్రాయం ఏర్పడుతుంది కదా…? మరి ఏమైనట్టు? ఆ అంబానీ ఎక్కడ? ఆ నత్వాని ఎక్కడ?
సీటు కోసమే రాష్ట్రం…!
ఏపీలో ఇది కొత్త కాదు. ఎప్పుడూ ఇంతే. హోదా, పదవి కోసం పరాయి రాష్ట్రాల వారు ఇక్కడకు రావడం అనుకున్నది తీసుకోడవం తర్వాత మొహం చాటేయడం జరుగుతూనే ఉంది. గతంలో ఏపీ కోటాలో నిర్మలా సీతారామన్ రాజ్యసభకు వెళ్లారు. రాష్ట్రానికి చేసిందేం లేదు. ఆమె తర్వాత సురేష్ ప్రభు రాజ్యసభకు వెళ్లారు. ఆయన మన రాష్ట్రం తరపున రాజ్యసభ సీటు తీసుకుని రైల్వే మంత్రిగానూ పని చేసారు. కానీ ఆయన రాష్ట్రానికి విదిల్చినది ఏమి లేదు. అవకాశం ఉన్నా, చేతిలో పదవి ఉన్నా రాష్ట్రానికి ఇచ్చిన ప్రత్యేక సాయం ఏమి లేదు. నాడు చంద్రబాబు చేసిన తప్పు నేడు జగన్ చేసారు. నాడు సురేష్ ప్రభు చేసిన నేరం , నేడు నత్వాని చేస్తున్నారు. నిజానికి సురేష్ ప్రభు కంటే నత్వాని చేయగలిగిన సాయమే, అయినా ఎందుకో ఉలుకు పలుకు లేదు. నత్వాని ఈ సమయంలో స్పందించకునే ఆయన కంటే ఈ ప్రభావం జగన్ పై ఎక్కువగా పడుతుంది.