మాస్, లవ్, యాక్షన్ సినిమాలు తీయడంలో దర్శకులకు ఉన్న సౌలభ్యం వేరు. చారిత్రక నేపథ్యం ఉన్న సినిమాలు తీయడం వేరు. చాలా శ్రమ, భారీ తారాగణం, సెట్టింగ్స్ తోపాటు ముఖ్యంగా ఆ సబ్జెక్ట్ పై విపరీతమైన పరిశోధన చేయాలి. సినిమా తీసేందుకు ధైర్యం కూడా కావాలి. ఈ తరహా గట్స్ ఉన్న తెలుగు దర్శకుల్లో గుణశేఖర్ ఒకరు. సోగసు చూడతరమా, రామాయణం, చూడాలని ఉంది, ఒక్కడు.. బ్లాక్ బస్టర్స్ తెరకెక్కించిన ఆయన చరిత్రను కూడా అద్భుతంగా తెరకెక్కించగలను అని నిరూపించారు. ఆ చారిత్రక కథాంశమే ‘రుద్రమదేవి’. 2015 అక్టోబర్ 9న విడుదలైన ఈ సినిమాకు నేటితో 5 ఏళ్లు పూర్తయ్యాయి.
పాఠ్యాంశాల్లో చదివి తెలుసుకున్న రుద్రమదేవి వీరత్వానికి దర్శకుడిగా తెర రూపం ఇచ్చారు గుణశేఖర్. ఆమె వీరగాధను చూసి ప్రేక్షకులు ఔరా అనిపించేలా సినిమాగా మలిచారు. రుద్రమదేవి పాత్రలో అనుష్క ప్రాణప్రతిష్ట చేసింది. అరుంధతి తర్వాత రుద్రమదేవిలో అనుష్కకు పూర్తిస్థాయి నటన ప్రదర్శించే అవకాశం దక్కింది. నిజంగా ఆమెలో రుద్రమదేవినే చూశారు ప్రేక్షకులు. భారీ సెట్టింగ్స్ కు తోడు వీఎఫ్ఎక్స్ టెక్నాలజీ సినిమాను అద్భుతంగా వచ్చేలా చేశాయి. అనుష్క తర్వాత సినిమాలో ముఖ్యమైన గోన గన్నారెడ్డి పాత్రను అల్లు అర్జున్ పోషించిన తీరు సినిమాకే హైలైట్ గా నిలిచింది. భారీ ఖర్చుతో తెరకెక్కించిన రుద్రమదేవిని 3డీ టెక్నలజీలో కూడా తెరకెక్కించి సినిమాకు భారీతనం తీసుకొచ్చారు.
లేడీ ఓరియెంటెడ్ సినిమాల్లో దేశంలోనే అప్పటికి అత్యధిక కలెక్షన్లు వసూలు చేసిన సినిమాగా నిలిచింది రుద్రమదేవి. 100 కోట్లు పైగా వసూలు చేసి సంచలనం రేపింది. రుద్రమదేవి వీరత్వం గురించి మెగాస్టార్ చిరంజీవి ఇచ్చిన వాయిస్ ఓవర్ సినిమాకు అదనపు హంగుగా నిలిచింది. ఇళయరాజా సంగీతం ప్రేక్షకుల్ని సినిమాలో లీనమయ్యేలా చేసింది. గుణశేఖర్ స్వీయ నిర్మాణంలో ఈ సినిమా తెరకెక్కింది. పలు అవార్డులు సాధించిన రుద్రమదేవి తెలుగు సినిమా ఖ్యాతిని పెంచింది. తెలంగాణ రాష్ట్ర ప్రభుత్వం ఈ సినిమాకు పన్ను మినహాయింపును ఇవ్వడం విశేషం.