Mekatoti Sucharita: సీఎం జగన్ నూతన కేబినెట్ లో స్థానం లభించక పోవడంతో చాలా మంది ఆశావాహులు నిరాశకు గురి అయ్యారు. కొందరు తమ ఆవేదన ను బహిర్గతం చేస్తుండగా మరికొందరు లోలోపల కుమిలిపోతున్నారు. ఆ నాయకుల అభిమానులు ఆందోళనలు చేస్తున్నారు. పలువురు ప్రజాప్రతినిధులు తమ నేతలకు మద్దతుగా సామూహిక రాజీనామా లకు సిద్ధం అవుతున్నారు. ఈ తరుణంలో తాజా మాజీ హోం మంత్రి మేకతోటి సుచరిత ఎంఎల్ఏ పదవికి రాజీనామా చేసారు.
పాత మంత్రి వర్గంలోని ఇతర ఎస్సీ నేతలందరిని కొనసాగిస్తూ తనను మాత్రమే పక్కకు పెట్టడం పై ఆమె తీవ్ర మనస్తపానికి గురి అయ్యారు. ఆమె అనుచరులు, పెద్ద సంఖ్యలో కార్యకర్తలు గుంటూరులోని ఆమె నివాసం వద్ద కు చేరుకొని నిరసన వ్యక్తం చేసారు. మేకతోటి సుచరిత ను బుజ్జగించడానికి వైసీపీ రాజ్యసభ సభ్యుడు మోపిదేవి వెంకట రమణ ఆమె నివాసానికి వచ్చి కొద్దిసేపు చర్చించారు. ఈ సందర్భంలో ఆమె అనుచరులు ఆయన్ను ఘోరావ్ చేశారు. సుచరిత ఎమ్మెల్యే పదవికి రాజీనామా చేస్తూ ఆ లేఖ ను మోపిదేవి వెంకటరమణ కు అందజేశారు. పార్టీ కి రాజీనామా చేయలేదని, ఎమ్మెల్యే పదవికి రాజీనామా లేఖ ఇచ్చినట్లు ఆమె కుమార్తె మీడియా కు చెప్పారు. స్పీకర్ ఫార్మట్ లో రాజీనామా లేఖ ఇచ్చినట్లు తెలిపారు.
కాగా ముఖ్య మంత్రి పంపిన నూతన మంత్రుల జాబితాnను గవర్నర్ బిశ్వభూషణ్ హరిచందన్ అమోదించారు. రేపు ఉదయం 11.31గంటలకు నూతన మంత్రులతో గవర్నర్ సచివాలయం వద్ద ఏర్పాటు చేసిన వేదిక పై ప్రమాణ స్వీకారం చేయించనున్నారు.
