House shifting : సాధారణంగా మనం ఏదైనా ఒక పెద్ద వస్తువును ఒకచోట నుంచి మరొక చోటుకు మార్చాలంటే కొంత మంది సహాయం తప్పనిసరిగా ఉంటుంది. చిన్న పని నుంచి మొదలుకొని పెద్ద పని వరకు అందరూ కలిసికట్టుగా పని చేస్తే ఆ పనిలో ఉన్నటువంటి అలసట మనకు కనిపించదు.”ఐక్యమత్యమే మహాబలం”అనే సామెత ప్రస్తుతం నాగాలాండ్ లోని గ్రామ ప్రజలకు సరిగ్గా సరిపోతుంది. నాగాలాండ్ లోని ఒక గ్రామంలో గ్రామ ప్రజలందరూ కలిసికట్టుగా ఏకమై ఒక గుడిసెను ఒకచోట నుంచి మరొక చోటుకు ఎంతో సునాయాసంగా తరలించిన ఘటన ఇందుకు నిదర్శనమని చెప్పవచ్చు. పూర్తి వివరాల్లోకి వెళితే…
నాగాలాండ్ లోని ఒక గ్రామంలో ఒక గుడిసె కొన్ని కారణాల వల్ల ఒకచోట నుంచి మరొక చోటుకు మార్చాల్సిన పరిస్థితి ఏర్పడింది. ఈ నేపథ్యంలోనే ఆ గ్రామ ప్రజలందరూ కలిసికట్టుగా ఆ గుడిసెను నాలుగువైపుల చేతులతో పట్టుకొని కాలినడకన ఒక ప్రదేశం నుంచి మరొక ప్రదేశానికి మార్చారు. ఈ ఘటనకు సంబంధించిన ఒక వీడియోను ఇండియన్ ఫారెస్ట్ సర్వీస్ ఆఫీసర్ సుధా రామెన్ తన ట్విట్టర్ ఖాతా ద్వారా పోస్ట్ చేశారు.ప్రస్తుతం ఈ వీడియో సోషల్ మీడియాలో వైరల్ గా మారింది.
ఫారెస్ట్ ఆఫీసర్ సుధా రామెన్ ఈ వీడియోను పోస్ట్ చేయడంతో పాటు, “ఐక్యమత్యమే మహాబలం అని నాగాలు మనకు చూపించే వీడియో ఇది. నాగాలాండ్లోని ఓ గ్రామంలో హౌస్ షిఫ్టింగ్ చాలా పురోగతిలో ఉంది”. అంటూ ఒక కామెంట్ ను కూడా జతచేశారు.ఈ వీడియో సోషల్ మీడియాలో వైరల్ గా మారడంతో సుమారు తొమ్మిది వేలకు పైగా నెటిజనులు ఈ వీడియోని చూశారు. ఈ వీడియో చూసిన నెటిజన్లు “చక్రాలు లేకుండా స్థలం మారిన గుడిసె”, “గుడిసెకు కాళ్లు వచ్చాయా”?, “చాలా అద్భుతం” అంటూ ఒక్కొక్కరు తమదైన శైలిలో కామెంట్లు పెడుతున్నారు.ప్రస్తుతం ఈ వీడియో సోషల్ మీడియాలో చక్కర్లు కొడుతోంది.