Viveka Murder Case: రెండు తెలుగు రాష్ట్రాల్లో తీవ్ర సంచలనం సృష్టించిన మాజీ మంత్రి వైఎస్ వివేకానంద రెడ్డి హత్య కేసులో పలువురు ప్రధాన నిందితులను ఇప్పటికే సీబీఐ అరెస్టు చేసిన సంగతి తెలిసిందే. ఈ హత్య కేసులో నిందితుల్లో ఒకడైన వివేకా కారు డైవర్ షేక్ దస్తగిరి ఆగస్టు 30న హత్యకు సంబంధించి పూర్వాపరాలను కన్ఫెషన్ స్టేట్ మెంట్ ఇచ్చారు. కన్ఫెషన్ స్టెట్ మెంట్ లో కడప ఎంపీ అవినాష్ రెడ్డి పేరు కూడా ప్రస్తావించారు. సీఆర్పీసీ 164(1) సెక్షన్ కింద పొద్దుటూరు కోర్టులో వ్యాగ్మూలం రికార్డు చేశారు. దస్తగిరి కన్ఫెషన్ స్టేట్ మెంట్ ను మిగతా నిందితుల న్యాయవాదులకు కోర్టు ఇచ్చింది.
Viveka Murder Case: హత్యకు సూత్రధారి ఎర్ర గంగిరెడ్డే
బెంగళూరు భూ వివాదంలో వాటా ఇవ్వకపోవడంతో ఆగ్రహంతో ఉన్న ఎర్ర గంగిరెడ్డి వివేకా హత్యకు ప్లాన్ చేశాడనీ, ఎర్ర గంగిరెడ్డి, సునీల్ యాదవ్, ఉమాశంకర్ రెడ్డితో కలిసి హత్య చేసినట్లు దస్తగిరి కన్ఫెషన్ స్టేట్ మెంట్ లో పేర్కొన్నాడు. ఎమ్మెల్సీ ఎన్నికల్లో తనను గంగిరెడ్డి మోసం చేశారనీ వివేకా గంగిరెడ్డి, అవినాష్ లకు వార్నింగ్ ఇచ్చారని వాగ్మూలంలో పేర్కొన్నాడు. ఎమ్మెల్సీ ఎన్నికల తరువాత కొన్ని రోజుల పాటు వైఎస్ వివేకా, గంగిరెడ్డి మధ్య మాటలు బంద్ అయ్యాయని తెలిపారు. కోటి రూపాయలు ఇస్తాం, వివేకాను హత్య చేయాలని గంగిరెడ్డి ఆఫర్ చేసినట్లు దస్తగిరి వెల్లడించాడు.
వివేకా హత్యకు 40 కోట్ల సుపారీ
మొత్తం హత్యకు 40 కోట్ల రూపాయల సుపారీ కాగా తనకు అయిదు కోట్లు ఇస్తానని ఆఫర్ చేసి కోటి రూపాయలు అడ్వాన్స్ గా ఇచ్చారని దస్తగిరి వెల్లడించారు. తనకు ఇచ్చిన అడ్వాన్స్ లో 25 లక్షలు సునీల్ యాదవ్ తిరిగి తీసుకున్నాడని చెప్పారు. మిగిలిన 75 లక్షలు తన స్నేహితుడు మున్నా దగ్గర దాచినట్లు పేర్కొన్నారు. సునీల్ యాదవ్, ఉమా శంకరరెడ్డి కలిసి వివేకా ఇంటి దగ్గర కుక్కను కారుతో తొక్కించి చంపేసినట్లు తెలిపారు. సునీల్ యాదవ్, ఉమా శంకర్ రెడ్డితో కలిసి తాను వివేకా ఇంటి ప్రహరీగోడ దూకి లోపలికి వెళ్లినట్లు దస్తగిరి వెల్లడించారు. అప్పటికే ఇంట్లో ఉన్న ఎర్ర గంగిరెడ్డి తలుపు తీయడంతో లోపలికి వెళ్లినట్లు కన్షెషన్ స్టేట్ మెంట్ లో పేర్కొన్నాడు దస్తగిరి.
