Ravi Teja-Nikhil: టాలీవుడ్ యంగ్ హీరో నిఖిల్.. మాస్ మ‌హారాజ్ ర‌వితేజ‌కే స‌వాల్ విస‌ర‌బోతున్నాడు. ర‌వితేజ ఉంటే నాకేంటి అన్న‌ట్లుగా నిఖిల్ డేరింగ్ స్టెప్ వేసేందుకు సిద్ధం అయ్యాడు. పూర్తి వివ‌రాల్లోకి వెళ్తే.. నిఖిల్ చేస్తున్న చిత్రాల్లో `18 పేజెస్` ఒక‌టి. పల్నాటి సూర్యప్రతాప్ దర్శకత్వం వహిస్తున్న ఈ చిత్రంలో అందాల భామ అనుపమ పరమేశ్వరన్ హీరోయిన్‌గా న‌టిస్తోంది.
అల్లు అరవింద్ సమర్పణలో గీతా ఆర్ట్స్, సుకుమార్ రైటింగ్స్ బ్యానర్ల పై బన్నీ వాసు, సుకుమార్ క‌లిసి ఈ చిత్రాన్ని నిర్మిస్తున్నారు. గోపీసుందర్ స్వ‌రాలు స‌మ‌కూర్చుతున్నాడు. రొమాంటిక్ కామెడీ ఎంట‌ర్‌ టైన‌ర్‌గా రూపొందిన ఈ సినిమాను ఫిబ్ర‌వ‌రి 18న విడుద‌ల చేస్తున్న‌ట్టు ఎప్పుడో ప్ర‌క‌టించారు. కానీ, ప‌లు కార‌ణాల వ‌ల్ల విడుద‌ల వాయిదా ప‌డింది.
అయితే ఇప్పుడీ మూవీని జూన్ 17న రిలీజ్ చేయాల‌ని భావిస్తున్నార‌ట. త్వ‌ర‌లోనే ఓ పోస్ట‌ర్ ద్వారా ఈ విష‌యాన్ని అనౌన్స్ కూడా చేయ‌నున్నార‌ని టాక్ న‌డుస్తోంది. అయితే ఇప్పుడిదే విష‌యం నెట్టింట హాట్ టాపిక్‌గా మారింది. ఎందుకంటే, ర‌వితేజ న‌టించిన `రామారావు ఆన్ డ్యూటీ` సినిమాను జూన్ 17వ తేదీన విడుద‌ల చేయ‌బోతున్న‌ట్లు ఇటీవ‌లె ప్ర‌క‌టించారు.
శరత్ మండవ దర్శకత్వం వ‌హించిన ఈ చిత్రంలో దివ్యాన్ష కౌశిక్, రజీషా విజయన్ హీరోయిన్లుగా అలరించనున్నారు. సీనియర్ హీరో వేణు తొట్టెంపూడి ఈ సినిమాతో రీ ఎంట్రీ ఇస్తున్నాడు. భారీ అంచ‌నాలు ఉన్న ఈ సినిమాకు పోటీగా నిఖిల్ దిగితే.. నెగ్గ‌గ‌ల‌డా అన్న‌ది ఇప్పుడు ఆస‌క్తిక‌రంగా మారింది.