(న్యూస్ ఆర్బిట్ డెస్క్)
సముద్రజలాలపై తేలియాడుతూ మరో లోకంలో విహరిస్తున్నాడా యువకుడు. అంత దూరం నుంచి ఒక షార్క్ చేప గమనించింది. ఆహా దొరికింది ఆహారం అనుకొని మెల్లగా కదిలింది. సర్ఫర్ వైపు రాసాగింది. పైన ఆకాశంలో ఒక డ్రోన్‌లో క్రిస్టఫర్ జాయిస్ అనే వ్యక్తి విహరిస్తున్నాడు. అతను గమనించకుంటే సర్ఫింగ్ చేస్తున్న మన యువకుడు ప్రాణాలు ప్రమాదంలో పడేవే. ఆస్ట్రేలియాలోని న్యూసౌత్ వేల్స్ తీరంలో ఈ సంఘటన జరిగింది.
https://youtu.be/juJwuLssdjU
క్రిస్టఫర్ జాయిస్ షార్క్ చేపలను ఫోటో తీసేందుకే తన డ్రోన్‌లో పైకి వెళ్లాడు. కింద ఒక షార్క్ చేప చురుకుగా వెళుతున్న సంగతి, దూరంగా ఒక సర్ఫర్ చుట్టుపక్కల ఏంజరుగుతున్నదీ పట్టించుకోక పోవడం జాయిస్ గమనించాడు. ఇదేదో కొంప ముంచుతుందని అనుకోగానే తన డ్రోన్‌కున్న స్పీకర్‌లో షార్క్, షార్క్ తప్పించుకో అంటూ పెద్దగా హెచ్చరించాడు. దానితో సర్ఫర్ ఈ లోకంలోకి వచ్చి షార్క్‌కు దూరంగా వెళ్లే ప్రయత్నం చేశాడు. అకస్మాత్తుగా సంభవించిన ఈ పరిణామంతో కలవరపడిన షార్క్ దారి మార్చుకుంది. నేను చాలాసార్లు షార్క్ చేపలను పైనుంచి చూశాను గానీ సర్ఫర్‌పై దాడి చేసేందుకు వెళ్లే షార్క్‌ను చూడడం ఇదే ప్రధమం అని జాయిస్ అన్నాడు.
