(న్యూస్ ఆర్బిట్ డెస్క్)
మహిళలకు పొడవాటి కురులే అందం. శిరోజాల విషయంలో వారు ఎంతో జాగ్రత్తగా ఉంటారు. ఒకటి రెండు వెంట్రుకలు ఊడిపోయాయంటే తెగ బాధపడిపోతుంటారు. కానీ కేరళకు చెందిన ఓ పోలీసు అధికారి మాత్రం అందుకు భిన్నంగా వ్యవహరించారు. ఓ మంచి పని కోసం ఏకంగా గుండు చేయించుకున్నారు. పోలీసు నిబంధనలు పక్కనపెట్టి ఆమె చేసిన ఈ పనికి పలువురు ప్రశంసలు కురిపిస్తున్నారు. క్యాన్సర్ వ్యాధి బారిన పడి జుట్టునంతా పోగొట్టుకునేవారి పరిస్థితి ఊహించుకుంటేనే ఎంతో బాధగా ఉంటుంది. అందుకే త్రిశూర్ జిల్లా ఇరింజలకుడలోని మహిళా పోలీస్ స్టేషన్లో పని చేస్తున్న పోలీస్ అధికారిణి అపర్ణ లవకుమార్ గుండు కొట్టించుకుంది.
https://www.facebook.com/IjkVoice/videos/2405646869717128/
క్యాన్సర్ అవేర్నెస్ డ్రైవ్లో భాగంగా స్థానిక పాఠశాలలో ఓ పదేళ్ల చిన్నారిని కలిసిన తర్వాత ఈ నిర్ణయం తీసుకున్నారు. అందుకు ఆమె తన ఉన్నతాధికారుల నుంచీ అనుమతి కూడా పొందింది. కిమోథెరపీ వల్ల చాలా మంది రోగులు జుట్టు కోల్పోయి బాధను అనుభవిస్తారు. అలాంటి వారికి అండగా ఉండేందుకు తన వెంట్రుకలను విగ్గు తయారు చేసేందుకు ఇచ్చారు. అపర్ణ లవకుమార్ తన మానవత్వాన్ని చాటిన ఈ వీడియో ఇప్పుడు సోషల్ మీడియాలో చక్కర్లు కొడుతోంది. అపర్ణకు సర్వత్రా ప్రశంసలు అందుతున్నాయి.
అందం అనేది బాహ్య సౌందర్యంలోనిది కాదని.. మనం చేసే ప్రతి పని, ప్రతి మాటలో కనిపించాలంటారు అపర్ణ లవకుమార్. గతంలో తమ చిన్నారికి చికిత్స చేయించాలని ఓ పేద కుటుంబం అపర్ణను ఆశ్రయించింది. వెంటనే తన చేతికున్న బంగారు గాజులను తీసి వారికి ఇచ్చారు.