శాన్ ఫ్రాన్సిస్కో: మన మరణవార్త మనకే తెలిస్తే ఎలా ఉంటుంది? ఒకవేళ అలాంటిది ఎవరైనా చెప్పాలన్నా చాలా జాగ్రత్తగా, సున్నితంగా చెబుతారు. అలాంటిది సుమారు 70లలో ఉన్న ఒక అమెరికన్ వ్యక్తికి అత్యంత అమానవీయంగా ఈ విషయం చెప్పారు. రేపు మీరు మరణిస్తారని ఎర్నెస్ట్ క్వింటానా అనే పెద్దాయనకు రోబోటిక్ పద్ధతిలో వీడియో కాన్ఫరెన్సు ద్వారా చెప్పారు. కొన్ని పరిస్థితులకు రోబోటిక్ డాక్టర్ పర్వాలేదు గానీ, మృత్యువు విషయాన్ని ఇలా చెప్పడం సరికాదని కుటుంబసభ్యులు మండిపడ్డారు. ఈ విషయాన్ని ఆయన మనవరాలు అనాలిసియా విల్హార్మ్ ఫేస్ బుక్ ద్వారా వెల్లడించారు. తన తాత వీడియోలో మాట్లాడుతున్న స్క్రీన్ షాట్ ను కూడా ఆమె అందులో పోస్ట్ చేశారు.
ఊపిరితిత్తులు బాగా పాడైపోయాయని, అందువల్ల ఇక మరణం తప్పదని వీడియోలో డాక్టర్ చెప్పే సమయానికి క్వింటానా వద్ద అనాలిసియా ఒక్కర్తే ఉంది. ఆయన చాలా అనారోగ్యంతో ఉన్నందున మరణం తప్పదని తమకు కూడా తెలుసన్నారు. కానీ ఇంత దారుణంగా ఈ విషయం చెప్పడం సరికాదని ఆమె కేటీవీయూ అనే స్థానిక టీవీ చానల్ కు చెప్పారు. ఆమె తాతకు వినికిడి సమస్య ఉండటంతో.. ఆమే ఈ విషయాన్ని ఆయనకు చెప్పాల్సి వచ్చింది.
ఈ విషయం బయటకు వచ్చిన తర్వాత ఆయనకు చికిత్స చేసిన కైజర్ పెర్మనెంటె మెడికల్ సెంటర్ స్పందించింది. ఆయన మృతిపట్ల సంతాపం చెప్పింది. కానీ, రోబోట్ పద్ధతిలో మాత్రం తాము చెప్పలేదని ఖండించింది. స్వయంగా డాక్టరే టెలి-వీడియో టెక్నాలజీతో ఇలాంటి విషయాలు చెబుతారని తెలిపింది. ఆ గదిలో మరో నర్సు లేదా వైద్యుడు కూడా ఉంటారని ఆసుపత్రి వర్గాలు వెల్లడించాయి. అయితే, రోగి కుటుంబ సభ్యుల అంచనాలు వేరేలా ఉంటాయని తాము తెలుసుకోలేకపోయామన్నాయి. ఈసారి టెలివీడియో పద్ధతిని ఎలా మెరుగుపరుచుకోవాలో తెలుసుకోడానికి ఇది ఒక అవకాశమని ఆసుపత్రి వర్గాలు అన్నాయి.
