మాస్కో: బాక్సింగ్,మిక్స్డ్ మార్షల్ ఆర్ట్స్ వంటి ఫైటింగ్ పోటీల గురించి ప్రత్యేకంగా చెప్పనక్కర్లేదు. కానీ చెంప దెబ్బలకు కూడా ఒక టోర్నమెంట్ నిర్వహిస్తారంటే ఆశ్చర్యం కలగకమానదు. వింతగా ఉన్నా ఇది నిజమే.
రష్యాలోని క్రాస్నోయర్స్క్ ప్రాంతంలో ప్రతియేటా వారాంతపు రోజుల్లో రెండు రోజుల పాటు ఈ టోర్నీ కొనసాగుతుంది. ఈ సంవత్సరంలో గత వారం 16 ,17 తారీఖుల్లో ఈ పోటీలు జరిగాయి. సైబీరియన్ పవర్ షో స్పోర్ట్స్ ఫెస్టివల్లో భాగంగా ఈ టోర్నీని నిర్వహిస్తుంటారు.
టోర్నమెంట్లో పాల్గొనాలంటే మన చేతుల్లో బలం, ప్రత్యర్థి కొట్టే చెంప దెబ్బలను తట్టుకునే సామర్థ్యం మనకు ఉంటే చాలు. పెద్దగా కసరత్తు చేయాల్సిన పని ఉండదు.
ఈ చెంప దెబ్బల పోటీలో ఒక్కొక్క పోటీదారుడికి మూడు చాన్సులు ఇస్తారు. ఆ మూడు దెబ్బల్లో అవతలి వ్యక్తిని చెంప దెబ్బలు కొట్టడం ద్వారా మట్టికరిపించాలి.
గేమ్ విధానం:
- వేదిక మీద ఒక టేబుల్ ఉంటుంది. టేబుల్కు ఇరువైపులా పోటీదారులు నిలుచుంటారు. కామెంటేటర్ కమ్ అంపైర్ సమక్షంలో చెరో మూడు దెబ్బలు కొట్టాలి.
- ఇక్కడ దయాదాక్షిణ్యాలకు చోటు ఉండదు. ఎంత గట్టిగా కొట్ట గలిగితే అంతగా టైటిల్కు చేరువ అవుతారు.
- అంత గట్టిగా దెబ్బలు తిన్నాక చెంపలు కందిపోవటం, దవడలు పగిలిపోవడం సర్వసాదరణం. కాబట్టి పోటీ ముగిసిన వెంటనే డాక్టర్తో వైద్యపరీక్షలు చేయించి అవసరమైతే ఉచితంగా చికిత్స అందిస్తారు.
- ఇక, ఈ టోర్నమెంట్ లో విజేతకు రష్యాన్ కరెన్సీలో 30 వేల రూబుళ్ల బహుమానాన్ని నిర్వాహకులు అందజేస్తారు.
30 వేల రూబుళ్లు అంటే మన దేశీయ కరెన్సీలో 32 వేల రూపాయలు. ఈ ఏడాది జరిగిన పోటీల్లో వాసిలీ కామోట్స్కీ అనే యువకుడు విజేతగా నిలిచాడు.
Meanwhile in Russia…the 'male slapping championships' took place in Krasnoyarsk. The winner, Vasiliy Kamotskiy (left) took home 30,000 rubles (£350) ???pic.twitter.com/aXQkMkmbd6
— Danny Armstrong (@DannyWArmstrong) March 19, 2019