(న్యూస్ ఆర్బిట్ డెస్క్)
మనం పెంపుడు కుక్కతో కలిసి ఈ ఆట ఆడుతాం. ఏదైనా బంతి గానీ, మరో ఆటవస్తువు గానీ విసిరేస్తే కుక్క పరుగుపరుగున వెళ్లి దానిని నోట కరచుకుని వస్తుంది. ఆ బోట్ ప్రయాణీకులు సముద్రంలో బెలూగా తిమింగలంతో ఈ బంతాట ఆడారు. తెల్లగా మంచులాగా మెరిసిపోతున్న బెలూగా తిమింగలం మనుషులతో కలిసి ఆటలాడడం నెటిజెన్స్ మనసు దోచింది.
రగ్బీ ఆట అభిమానులు ఇద్దరు ఆర్కిటిక్ ధృవప్రాంతంలో విలాసవంతమైన బోట్లో ప్రయాణిస్తుండగా బెలూగా తిమింగలం ఒకటి వారి కంట పడింది. వారిలో ఒకరు రగ్బీ బంతి విసరగా తిమింగలం వెళ్లి దానిని నోట కరచుకుని తెచ్చిఇచ్చింది. దానితో అతను బంతిని ఇంకాస్త విసురుగా విసిరాడు. తిమింగలం ఒక్క ఉదుటున డైవ్ చేసి దూసుకువెళ్లింది. బంతిని మళ్లీ తెచ్చిచ్చింది. ఈ వీడియో వెంటనే వైరల్ అయింది.
Video Courtesy: The Guardian
బెలూగా తిమింగలాలు మనుషులతో స్నేహంగా ఉంటాయి. అవి ఇలా ఆటలాడడం కూడా కద్దు. బెలూగా తిమింగలాలు మనుషులతో ఆటలాడుతున్న వీడియోలు చాలా గతంలో వైరల్ అయ్యాయి. ఈ వీడియోకు కొందరు నెటిజెన్ల స్పందన ఎలా ఉందో చూడండి.